Etter ein hektisk periode med jobbing frå tidleg til seint, er det nå litt rolegare, og me kan få tid til å gi ei lita oppdatering av korleis det går med Pitch and Putt bana vår.

Det er ingen tvil om at den siste månaden har vert hektisk. I tillegg til at anlegget skal ferdigstillast er det med aukande grasvekst blitt meir og meir vedlikehold med greener og fairwayer, men det er dette me jobbar mot, og det er kjempe kjekt å sjå at greenane betrast og fairwayane tettast.

Mykje har skjedd sidan forrige innlegg 11. februar. Driving rangen er klar til bruk, det samme er Pro-shopp og redskapshus. Det er komt opp skilt og markeringspinnar for “out of bounds” og “grunn under reparasjon”, Greenane er vorte gjødsla 3 gonger, og det er sanda, lufta, vatna og vertikalskore. Med intensiv pleie kan me sjå klar forbetring på greenkvalitet, og greenane er etterkvart komme opp på eit bra nivå.

Men det er fortsatt litt å gå på, både på fairwayane og greenane og me har derfor funne det hensiktsmessig å utsetja opninga til laurdag 13. juni. Det vil då verte opningsturnering. Følg med her på heimasida vår for nærmare informasjon angåande påmelding og program for denna dagen.

Sjølv har me allereie prøvespela bana fleire gongar, og det kan meldast at bana er både utfordrande og kjekk å spela.

Allereie frå neste veka vil det verte mogelegheit for medlemmar og sponsorar å spela nokre timar på kveldstid. Så viss du vil bli medlem, og ha mogelegheit til å spela Pitch and Putt i ein heil månad på ein lite traffikert bane, er det berre til å ta kontakt. Det er allereie komme ein del medlemmer på blokka. Send ein mail til ksgolfpark@gmail.com, eller stikk innom Golfparken etter klokka 18.00 på ettermiddagen for å teikna medlemsskap for sesongen 2009. Eit slikt medlemsskap gjev full spelerett i Golfparken, innanfor dei opningstidene som vil komme. Me vil også gjera oppmerksom på at bana kan verte stengt under spesielle arrangement og turneringar.

Me jobbar med å bli tatt inn som medlem i NPPF(Norges Pitch and Putt Forbund) og reknar med å ha dette klart innan kort tid. Dette vil gi spanande mogelegheitar med blant anna kvalifiseringsspel til NM.

Ein stor takk rettes til dei bedriftane som har signert samarbeidsavtale, eller har vore med å bidrege på andre måtar, og som har sagt seg villig til å vera med å støtta drift og vidare utvikling av Pitch and Putt bana.

Me sjåast på regionens første Pitch and Putt bane……